నర్సు హత్య.. డీఎన్‌ఏతో కీలక మలుపు!

తుక్కుగూడలో 21 ఏళ్ల నర్సుపై లైంగిక దాడి చేసి హత్య చేసినట్లు నమోదైన సంచలన కేసులో కీలక పరిణామం చోటుచేసుకుంది. బాధితురాలి నుంచి సేకరించిన జీవ నమూనాల్లో లభించిన డీఎన్‌ఏ ప్రొఫైల్‌, అరెస్టయిన నిందితుడు మహ్మద్‌ సనావుల్లా(34) డీఎన్‌ఏతో సరిపోలినట్లు ఫోరెన్సిక్‌ నివేదిక వెల్లడించినట్టు పోలీసు వర్గాల సమాచారం. దీంతో ఇప్పటివరకు సాంకేతిక, పరిస్థితుల ఆధారాలతో సాగుతున్న దర్యాప్తుకు కీలక శాస్త్రీయ ఆధారం తోడైనట్లయింది.
తుక్కుగూడలోని ఓ ప్రైవేట్‌ ఆస్పత్రిలో నర్సుగా పనిచేస్తున్న యువతి ఆగస్టు 29న తన గదిలో మృతిచెందిన స్థితిలో కనిపించింది. దర్యాప్తు చేపట్టిన పోలీసులు సమీపంలో మెకానిక్‌గా పనిచేస్తున్న సనావుల్లాను అరెస్టు చేశారు. బాధితురాలి కదలికలను నిందితుడు కొంతకాలంగా గమనిస్తున్నట్లు పోలీసుల దర్యాప్తులో తేలినట్టు సమాచారం.
ఘటన జరిగిన రాత్రి కిటికీ దారిలో గదిలోకి ప్రవేశించిన నిందితుడు ఆమెపై దాడికి ప్రయత్నించగా యువతి తీవ్రంగా ప్రతిఘటించినట్లు పోలీసులు చెబుతున్నారు. ఈ క్రమంలో అతడి వేలిని కొరకడంతో పాటు గోళ్లతో గాయపరిచినట్లు దర్యాప్తులో గుర్తించారు. అనంతరం ఆమెను హత్య చేసి లైంగిక దాడికి పాల్పడినట్లు పోలీసుల అభియోగం.
తాజాగా వచ్చిన డీఎన్‌ఏ నివేదికతో కేసు మరింత కీలక దశకు చేరింది. ఘటనాస్థల ఆధారాలు, వైద్య–ఫోరెన్సిక్‌ నివేదికలు, సాంకేతిక ఆధారాలను సమగ్రంగా పొందుపరిచి బలమైన అభియోగపత్రం సిద్ధం చేయడంపై పోలీసులు దృష్టి పెట్టినట్లు సమాచారం. అయితే నిందితుడిపై నమోదైన ఆరోపణలు న్యాయస్థానంలో నిరూపితమవాల్సి ఉంది.

చివరి వరకు పోరాడింది!

తనపై దాడి జరిగిన సమయంలో యువతి మౌనంగా లొంగిపోలేదని దర్యాప్తులో బయటపడిన అంశాలు చెబుతున్నాయి. నిందితుడి వేలిని కొరకడం, శరీరంపై గోళ్లతో గాయపరచడం ఆమె తీవ్రంగా ప్రతిఘటించినట్లు సూచిస్తున్నాయని పోలీసులు భావిస్తున్నారు. ఇప్పుడు ఫోరెన్సిక్‌ డీఎన్‌ఏ ఫలితం కూడా కేసులో కీలక ఆధారంగా మారడంతో నిందితుడిపై అభియోగాలను శాస్త్రీయ ఆధారాలతో నిరూపించడమే దర్యాప్తు సంస్థ ముందున్న కీలక దశ.