స్పీకర్‌పై వ్యాఖ్యలు.. తాతా మధు అరెస్ట్!

హైదరాబాద్‌, సెప్టెంబర్‌ 8 (మన విశ్వం): అసెంబ్లీ స్పీకర్‌ గడ్డం ప్రసాద్‌కుమార్‌పై అనుచిత వ్యాఖ్యలు చేశారన్న ఆరోపణల వ్యవహారం బీఆర్‌ఎస్‌ ఎమ్మెల్సీ తాతా మధు అరెస్టుకు దారితీసింది. మంగళవారం ఉదయం న్యూ ఎమ్మెల్యే క్వార్టర్స్‌కు భారీగా చేరుకున్న పోలీసులు ఆయనను అదుపులోకి తీసుకుని నారాయణగూడ పోలీస్‌స్టేషన్‌కు తరలించారు. తాతా మధుపై ఎస్సీ, ఎస్టీ అట్రాసిటీ చట్టం కింద కేసు నమోదైంది. ఆయన స్టేట్‌మెంట్‌ నమోదు అనంతరం నాంపల్లి కోర్టులో హాజరుపర్చేందుకు పోలీసులు ఏర్పాట్లు చేస్తున్నారు.
సోమవారం అసెంబ్లీ సమావేశాల సందర్భంగా నల్ల దుస్తులతో సభకు వెళ్లేందుకు ప్రయత్నించిన బీఆర్‌ఎస్‌ ఎమ్మెల్యేలు, ఎమ్మెల్సీలను పోలీసులు అడ్డుకోవడంతో గేటు వద్ద తీవ్ర ఉద్రిక్తత నెలకొంది. ఈ క్రమంలో తాతా మధు చేసిన వ్యాఖ్యలు స్పీకర్‌ను ఉద్దేశించినవేనంటూ అధికార కాంగ్రెస్‌ తీవ్రంగా మండిపడింది. వ్యాఖ్యలపై స్పీకర్‌ ప్రసాద్‌కుమార్‌ సభలో భావోద్వేగానికి గురికాగా.. సీఎం రేవంత్‌రెడ్డి సహా మంత్రులు, కాంగ్రెస్‌ నేతలు మధుపై కఠిన చర్యలు తీసుకోవాలని డిమాండ్‌ చేశారు.
తాతా మధు మాత్రం తాను స్పీకర్‌ను ఉద్దేశించి వ్యాఖ్యలు చేయలేదని సోమవారమే వివరణ ఇచ్చారు. స్పీకర్‌ వ్యవస్థతోపాటు ప్రసాద్‌కుమార్‌పై తనకు గౌరవం ఉందని, తన మాటలు ఆయనను ఉద్దేశించినట్లుగా భావిస్తే వాటిని ఉపసంహరించుకుంటున్నానని పేర్కొన్నారు.
ఇదిలా ఉండగా అసెంబ్లీ గేటు వద్ద చోటుచేసుకున్న పరిణామాలపై మొత్తం మూడు కేసులు నమోదైనట్లు సమాచారం. కేటీఆర్‌, హరీశ్‌రావు, ఎమ్మెల్యే సుధీర్‌రెడ్డి సహా మరికొందరిపైనా వివిధ సెక్షన్ల కింద కేసులు నమోదైనట్లు తెలుస్తోంది. తాతా మధు అరెస్టుతో అసెంబ్లీ గేటు వద్ద మొదలైన రాజకీయ రచ్చ ఇప్పుడు పోలీస్‌స్టేషన్‌, కోర్టు వరకు చేరింది.