‘బిగ్‌ అప్‌డేట్‌’తో బాంబు పేల్చనున్న సురేఖ!

తెలంగాణకు ‘స్టే ట్యూన్డ్‌’.. కొండా పోస్టుతో పొలిటికల్‌ హీట్‌

‘ఎదురుచూపులు దాదాపు ముగిశాయి’ అంటూ సంచలన సంకేతం

మంత్రి పదవి పోయిన వేళ.. తదుపరి అడుగుపై మరింత ఉత్కంఠ

కాంగ్రెస్‌లోనే సమరమా?.. కొత్త రాజకీయ నిర్ణయమా?
కొండా నోట రాబోయే ఆ ప్రకటన ఏంటన్నదే హాట్‌టాపిక్‌

హైదరాబాద్‌, సెప్టెంబర్‌ 4 (మన విశ్వం):
కొండా సురేఖ ఏం చేయబోతున్నారు?.. తెలంగాణ రాజకీయాలను కుదిపేసే నిర్ణయం తీసుకోబోతున్నారా?.. కొద్దిరోజులుగా ఆమె రాజకీయ భవిష్యత్‌పై నెలకొన్న సస్పెన్స్‌కు తెరదించే సమయం వచ్చేసిందా?.. తాజాగా సురేఖ పేరుతో ఉన్న ఫేస్‌బుక్‌ ఖాతాలో వచ్చిన ఒక్క పోస్టు ఈ ప్రశ్నలకు మరింత పదును పెట్టింది.
“The Wait Is Almost Over... A Big Update Is Coming Soon. Stay Tuned, Telangana!” అంటూ చేసిన పోస్టు రాజకీయ వర్గాల్లో కలకలం రేపుతోంది. ‘ఎదురుచూపులు దాదాపు ముగిశాయి.. భారీ అప్‌డేట్‌ త్వరలో వస్తోంది.. తెలంగాణ వేచి చూడండి’ అన్న అర్థంలో చేసిన ఈ వ్యాఖ్యకు పిడికిలి, నిప్పు ఎమోజీలను జతచేయడం మరింత ఆసక్తిని పెంచింది.
ఇటీవలి పరిణామాల నేపథ్యంలో సురేఖ చేసిన ఈ పోస్టు సాధారణ ప్రకటనగా కనిపించడం లేదు. మంత్రి పదవి నుంచి తప్పించిన తర్వాత ఆమె తదుపరి రాజకీయ అడుగు ఏమిటన్న చర్చ ఇప్పటికే జోరుగా సాగుతోంది. సరిగ్గా ఈ సమయంలోనే ‘బిగ్‌ అప్‌డేట్‌’ అంటూ సంకేతం రావడంతో రాజకీయంగా కీలక నిర్ణయం ప్రకటించబోతున్నారా? కాంగ్రెస్‌లో తన భవిష్యత్‌పై తేల్చబోతున్నారా? లేక తనపై జరిగిన పరిణామాలకు సంబంధించి సంచలన విషయాలు బయటపెట్టబోతున్నారా? అనే ఊహాగానాలు మొదలయ్యాయి.
అయితే సురేఖ చెప్పిన ‘బిగ్‌ అప్‌డేట్‌’ ఏమిటన్నది ఇంకా వెల్లడికాలేదు. అందువల్ల పార్టీ మార్పు, రాజీనామా లేదా మరే ఇతర నిర్ణయంపై ఇప్పుడే నిర్ధారణకు రావడానికి ఆధారం లేదు. కానీ ‘తెలంగాణ.. స్టే ట్యూన్డ్‌’ అంటూ ఆమె స్వయంగా సస్పెన్స్‌ను పెంచడంతో రాబోయే ప్రకటన రాజకీయ ప్రాధాన్యం సంతరించుకుంది.
వరంగల్‌ రాజకీయాల్లో బలమైన పట్టున్న కొండా కుటుంబం నుంచి వచ్చే నిర్ణయం స్థానిక సమీకరణాలకే పరిమితం కాకుండా రాష్ట్ర రాజకీయాల్లోనూ చర్చకు దారితీసే అవకాశముంది. దీంతో సురేఖ తదుపరి ప్రకటన కోసం అనుచరులతోపాటు రాజకీయ ప్రత్యర్థులూ ఆసక్తిగా ఎదురుచూస్తున్నారు.
‘వెయిట్‌ దాదాపు ఓవర్‌’ అని సురేఖ చెప్పేశారు. ఇక మిగిలింది ఒక్కటే—ఆమె పేల్చబోయే ‘బిగ్‌ అప్‌డేట్‌’ ఏంటి? తెలంగాణ రాజకీయాల్లో ఇప్పుడు ఇదే బిగ్‌ సస్పెన్స్‌!