పెళ్లి పేరుతో మోసం..? మాజీ ఎమ్మెల్యేపై కేసు

యువతి ఫిర్యాదుతో పంజాగుట్ట పోలీసుల నమోదులైంగిక

వేధింపులు, మోసం, డబ్బుల వసూళ్ల ఆరోపణలు

ఆధారాల సేకరణలో పోలీసులు.. అన్ని కోణాల్లో దర్యాప్తు

హైదరాబాద్, జూలై 31 (మన విశ్వం): హైదరాబాద్‌లోని పంజాగుట్ట పోలీస్ స్టేషన్‌లో బీఆర్ఎస్ మాజీ ఎమ్మెల్యే రేగా కాంతారావుపై ఓ యువతి ఫిర్యాదు మేరకు కేసు నమోదైంది. పెళ్లి చేసుకుంటానని నమ్మించి లైంగికంగా వేధించి, అనంతరం మోసం చేశారని బాధితురాలు చేసిన ఫిర్యాదు ఆధారంగా పోలీసులు భారతీయ న్యాయ సంహిత (బీఎన్‌ఎస్)లోని సంబంధిత సెక్షన్ల కింద కేసు నమోదు చేసి దర్యాప్తు ప్రారంభించారు.
ఫిర్యాదు ప్రకారం, ఇంటర్వ్యూ పేరుతో తనను ఓ ఫ్లాట్‌కు పిలిచి లైంగిక దాడికి పాల్పడ్డారని బాధితురాలు ఆరోపించింది. అనంతరం పెళ్లి చేసుకుంటానని హామీ ఇచ్చి తనతో సన్నిహిత సంబంధం కొనసాగించారని, తర్వాత ఆ మాట తప్పి మోసం చేశారని ఫిర్యాదులో పేర్కొంది.
అలాగే తనకు తెలియకుండా వ్యక్తిగత వీడియోలు చిత్రీకరించి వాటి ద్వారా ఇబ్బందులకు గురి చేశారని, రియల్ ఎస్టేట్ పెట్టుబడుల పేరుతో తన నుంచి భారీ మొత్తంలో డబ్బులు తీసుకున్నారని కూడా బాధితురాలు ఆరోపించింది. తన మొబైల్ ఫోన్‌కు యాక్సెస్ పొంది, తన స్నేహితురాలితో కూడా ఇదే తరహాలో పరిచయం పెంచుకునేందుకు ప్రయత్నించారని ఫిర్యాదులో వెల్లడించింది.
ఈ ఫిర్యాదుపై జూలై 26న కేసు నమోదు చేసిన పంజాగుట్ట పోలీసులు బాధితురాలి వాంగ్మూలాన్ని నమోదు చేయడంతో పాటు, సంబంధిత ఆధారాలను సేకరిస్తూ అన్ని కోణాల్లో దర్యాప్తు కొనసాగిస్తున్నారు. ఈ ఆరోపణలపై మాజీ ఎమ్మెల్యే రేగా కాంతారావు స్పందన ఇంకా వెలువడాల్సి ఉంది.

గమనిక: ఇవి ఫిర్యాదులో చేసిన ఆరోపణలు మాత్రమే. కేసు దర్యాప్తు కొనసాగుతోంది. ఆరోపణలు న్యాయస్థానంలో రుజువయ్యే వరకు అవి ఆరోపణలుగానే పరిగణించబడతాయి.