ప్రపంచ నంబర్‌వన్‌గా యాపిల్!

ప్రపంచ టెక్నాలజీ దిగ్గజం యాపిల్ మరో చారిత్రక ఘనతను సొంతం చేసుకుంది. మార్కెట్ విలువలో ఎన్విడియాను వెనక్కి నెట్టి ప్రపంచంలోనే అత్యంత విలువైన పబ్లిక్ కంపెనీగా మళ్లీ అగ్రస్థానాన్ని దక్కించుకుంది. అమెరికా స్టాక్ మార్కెట్‌లో మంగళవారం ట్రేడింగ్ సందర్భంగా కంపెనీ మార్కెట్ క్యాపిటలైజేషన్ తొలిసారిగా 5 ట్రిలియన్ డాలర్ల మైలురాయిని దాటింది. దీంతో ఈ ఘనత సాధించిన రెండో సంస్థగా యాపిల్ చరిత్ర సృష్టించింది.
ట్రేడింగ్ సమయంలో యాపిల్ షేరు ధర గరిష్ఠంగా 342.89 డాలర్లకు చేరుకోవడంతో కంపెనీ మార్కెట్ విలువ 5.036 ట్రిలియన్ డాలర్లకు ఎగబాకింది. అయితే చివరి గంటల్లో స్వల్ప లాభాల స్వీకరణతో షేరు ధర కొద్దిగా తగ్గడంతో మార్కెట్ విలువ మళ్లీ 5 ట్రిలియన్ డాలర్ల దిగువకు చేరింది.
2026 ప్రారంభం నుంచి యాపిల్ షేరు దాదాపు 25 శాతం పెరగడం కంపెనీకి కలిసివచ్చింది. ఇతర టెక్నాలజీ సంస్థల మాదిరిగా కృత్రిమ మేధ (ఏఐ)పై భారీగా పెట్టుబడులు పెట్టకుండా, వ్యయ నియంత్రణతో పాటు స్థిరమైన లాభదాయకతను కొనసాగించడం పెట్టుబడిదారుల విశ్వాసాన్ని మరింత పెంచినట్లు మార్కెట్ నిపుణులు విశ్లేషిస్తున్నారు.
ఇక త్వరలో యాపిల్ ప్రకటించనున్న తాజా త్రైమాసిక ఆర్థిక ఫలితాలపై మార్కెట్ ఆసక్తిగా ఎదురుచూస్తోంది. ఈ త్రైమాసికంలో కంపెనీ ఆదాయం గత ఏడాదితో పోలిస్తే సుమారు 15 శాతం పెరిగే అవకాశముందని విశ్లేషకులు అంచనా వేస్తున్నారు. ఫలితాలు అంచనాలకు అనుగుణంగా ఉంటే యాపిల్ షేర్లకు మరింత ఊతం లభించే అవకాశం ఉందని భావిస్తున్నారు.
మరోవైపు, గత ఏడాది నుంచి ప్రపంచంలోనే అత్యంత విలువైన కంపెనీగా కొనసాగిన ఎన్విడియా ఇటీవల మార్కెట్ ఒత్తిడిని ఎదుర్కొంటోంది. ఏఐ రంగానికి అవసరమైన గ్రాఫిక్స్ ప్రాసెసింగ్ యూనిట్ల (GPU)కు భారీ డిమాండ్‌తో 2025లో 5 ట్రిలియన్ డాలర్ల మార్కెట్ విలువను దాటిన తొలి సంస్థగా నిలిచిన ఎన్విడియా, ప్రస్తుతం ఏఐ పెట్టుబడులపై పెరుగుతున్న ఆందోళనల ప్రభావంతో షేర్లలో ఒడిదుడుకులను ఎదుర్కొంటోంది.
ఈ నేపథ్యంలో సోమవారం ఎన్విడియా షేర్లు సుమారు 5 శాతం క్షీణించగా, యాపిల్ షేర్లు బలంగా పుంజుకోవడంతో మార్కెట్ విలువలో తిరిగి అగ్రస్థానాన్ని యాపిల్ కైవసం చేసుకుంది. టెక్నాలజీ రంగంలో మరోసారి తన ఆధిపత్యాన్ని చాటుతూ ప్రపంచంలోనే అత్యంత విలువైన కంపెనీగా నిలిచింది.