రహదారులపై గాడితప్పుతున్న ప్రైవేటు వేగం!

ఆదిలాబాద్ (మన విశ్వం): రహదారులపై ప్రైవేటు ట్రావెల్స్‌ వాహనాల వేగం ప్రయాణికులను బెంబేలెత్తిస్తోంది. అతివేగానికి తోడు డ్రైవర్ల నిద్రమత్తు ప్రమాదాలకు కారణమవుతోందన్న ఆందోళన వ్యక్తమవుతోంది. మహారాష్ట్రలోని నాగపూర్‌ నుంచి హైదరాబాద్‌ వస్తున్న రాయల్‌ ట్రావెల్స్‌ స్లీపర్‌ బస్సు ఆదిలాబాద్‌ జిల్లా ఇచ్చోడా మండలం సత్‌నంబర్‌ గ్రామ సమీపంలో అదుపుతప్పి పొలాల్లోకి దూసుకెళ్లింది.
డ్రైవర్‌ నిద్రమత్తులోకి జారుకోవడంతోనే బస్సు అదుపుతప్పినట్లు ప్రయాణికులు పేర్కొన్నారు. ప్రమాదం జరిగిన వెంటనే గ్రామస్థులు స్పందించి ప్రయాణికులను బయటకు తీసుకొచ్చేందుకు సహకరించారు. పలువురు స్వల్ప గాయాలతో బయటపడటంతో పెను ప్రమాదం తప్పింది. ప్రైవేటు ట్రావెల్స్‌ వాహనాల వేగంతో పాటు డ్రైవర్ల పని, విశ్రాంతి సమయాలపై రవాణా శాఖ కఠిన పర్యవేక్షణ చేపట్టాలని ప్రయాణికులు కోరుతున్నారు.